قىزمەت گرۋپپاسى ديقاندارمەن بىرگە قاربالاستىققا ءتۇستى   قابا: قىزمەت گرۋپپاسىنداعى كادرلار ناقتى ىستەر ىستەپ بەردى   شينجياڭنىڭ «ەڭ زەرەكتەرىن» تاڭداۋ قيمىلى باستالدى   وتىرىقتانعان مالشىلاردىڭ تىڭ تىرلىگى   قىستاققا تۇسكەن كادرلار جۇرت جۇرەگىن توعىستىردى   بۋىرشىن: قوي باعىمشىلىعىنان ۇلگى كورسەتۋ قىستاعىن قۇردى   «كىتاپ وقىعىڭ كەلسە ومىربەكتى ىزدە»   ناراتتاعى نار جىگىت  

جارقىلداپ جۇرگەن جاقسى اعا

نۇرسادىق سەيىتقوجا ۇلى

2017.12.22 17:08 كەلۋ قاينارى : شينجياڭ گازەتىنەن

  مەنىڭ بالالىق شاعىم موڭعۇلكۇرە اۋدانىنىڭ شاتى قىرعىز ۇلتتىق اۋىلىندا ءوتتى، مىنە سول ءبىر قىزىققا تولى قيماس كۇندەردىڭ الىستاعانىنا دا 30 جىلدان اسىپتى. 1980 - جىلى مەن ورتالاۋ مەكتەپتى تاۋىستىم، سول جىلى 6 - شىلدە تۇستەن كەيىن ءبىزدىڭ سول كەزدەگى كلاس جەتەكشىمىز جازۋشى، مارحۇم ورالبەك ءمۇتالىپ ۇلى ءبىزدىڭ ۇيگە كەلىپ، ماعان: اۋداندىق پارتكوم ۇگىت ءبولىمى ەرىكتى تىلشىلەر كۋرسىن اشادى ەكەن، بۇل كۋرسىعا ساباق وتۋگە اقىن، جازۋشى، جۋرناليست ءمادي ابدىراحمان ۇلى ۇسىنىس ەتىلىپتى، سەن كۋرسىعا قاتىناس، اقپاراتتىڭ قىرى مەن سىرىن تۇسىنۋىڭە پايداسى تيەر، - دەدى. مەن قۋانعانىمنان نە دەرىمدى بىلمەي قالدىم.
  ەرتەسى تراكتورعا وتىرىپ اۋدانعا بارىپ، اۋداندىق پارتكوم ۇگىت بولىمىنە تىزىمگە الىنىپ بولعان سوڭ، كۋرس اشىلىپ جاتقان جەرگە كەلدىم. كلاستا كۋرسانتتارمەن بىرگە ءمادي اعا ساباققا دايىندالىپ جاتىر ەكەن. مەن سالەم بەرىپ، ءمادي اعامەن جانە كۇرسانتتارمەن تانىستىم. ءمادي اعا حابار - ماقالانى قالاي جازۋ، ماتەريالدى، فاكتتى قالاي جيناۋ جايلى توتەنشە تۇسىنىكتى، كوكەيگە قونىمدى ەتىپ ساباق ءوتتى. ارادا دەمالىس بولا قالعاندا، شابىتى شالقىعان اقىن اعا اباي قۇنانبايدىڭ، قاسىم امانجولدىڭ ولەڭدەرىن جاتقا وقۋمەن بىرگە، ءوزىنىڭ ولەڭدەرىن وقىعاندا، اياداي كلاس ءىشى دۋمانعا بولەنىپ، كۋرسانتتار شاتىرلاتا شاپالاق سوقتى. ءدال وسى كەزدە اۋداندىق ويىن - ساۋىق ۇيىرمەسىنىڭ باستىعى بولات سەرعازين باستاعان ونەرپازدار دومبىرا، گارمون سياقتى مۋزيكا اسپاپتارىن كوتەرىپ: «سىزدەردەن حال سۇراي كەلدىك»، - دەپ كىرىپ كەلدى. انشىلەر ءان شىرقادى، كۇيشىلەر كۇي شەرتتى، اسىرەسە، گارمونيس تان شياۋحۇڭنىڭ گارمونمەن ورىنداعان ورىستىڭ «سيگانوچكا» كۇيى مەن ءىليا جاقانوۆتىڭ «نەنى ويلادىڭ»، اسەت بەيسەيوۆتىڭ «التىنىم» اندەرى كلاس ىشىندەگى 40تان استام كۋرسانتتى قاتتى تەبىرەنتتى. تان شياۋحۇڭنىڭ سۇيرىك ساۋساقتارى گارمون تىلدەرىنە جابىسىپ قالعانداي، ونىڭ عاجايىپ تالانتتى، جەتىلگەن ورىنداۋشىلىق شەبەرلىگى، جان تەبىرەنتەرلىك اسەم ساز تىڭدارمانداردىڭ قۇلاق قۇرىشىن قاندىرىپ، قيالىن قيانعا سامعاتتى. وسى سۇلۋ سازعا قۇمارتقان ءمادي اعا قاتتى شابىتتانىپ، گارمونيس تان شياۋحۇڭعا ارناپ سول مايداندا ولەڭ وقىدى. سونداي - اق پۋشكيننىڭ، لەرمەنتوۆتىڭ ولەڭدەرىن ورىس تىلىندە وقىپ، كۋرسانتتاردى قايران قالدىردى.
  كەشكى استا ءمادي اعامەن بىرگە بولدىم، ول كىسى موڭعۇلكۇرە اۋدانى اقسۋ اۋىلىنان كەلگەن ەركىن ءتالىپپاي ۇلى ەكەۋىمىزدى جاتاعىنا شاقىرىپ: ءبىز جاقسىلاپ تانىسايىق، مىنا بالانىڭ اتى ناعىز، مەنىڭ ۇلكەن ۇلىم، بايقاسام ۇشەۋىڭنىڭ جاسىڭ قارايلاس سياقتى، ۇشەۋىڭ جاقسى دوس بولىپ جۇرىڭدەر، سەندەر، شىنىندا، باقىتتىسىڭدار. مەن جاستايىمنان اكە - شەشەمنەن جەتىم قالىپ، ءومىردىڭ بۇراڭ جولدارىن باسىمنان وتكەردىم، مەن وزدەرىڭدەي جاستاردى كورگەندە، ارمانعا، ساعىنىشقا تولى بوز بالالىق شاعىم كوز الدىما كەلەدى، سەندەر ءبىر - ءبىرىڭدى قۇرمەتتەپ، ۋاقىتتى، ءومىردى قادىرلەڭدەر، كىتاپتى كوپ وقىپ، ءبىلىم الۋدان استە جالىقپاڭدار. كۋرس اياقتاۋعا ءبىر كۇن قالدى، ەكەۋىڭ بىردەن حابار جازىپ ماعان بەرىڭدەر، مەن ونى گازەتكە جاريالايمىن، بۇل سەندەردىڭ اقپاراتقا العاش قادام باسقاندارىڭ بولسىن، - دەدى.
  ەرتەسى كۋرس اياقتاۋدان ءبىر كۇن بۇرىن، ءبىز جازعان حابار - ماقالامىزدى ءمادي اعاعا وقىپ بەردىك. ءمادي اعا تىڭداعان سوڭ ماعان: «سەنىڭ داۋىسىڭ وتە جاقسى ەكەن، سەن ديكتور بولۋعا لايىق ەكەنسىڭ، ىلە حالىق راديو ستانسياسى ديكتور العالى جاتىر، مەن بايلانىس جاساپ كورەيىن»، - دەدى. ءمادي اعانىڭ بۇل ءسوزى ماعان تەرەڭ اسەر ەتتى. مەن ەرتەسى «شاتى اۋىلى سۋ قۇرىلىسىن كەمەلدەندىردى» دەگەن قىسقا حابارىمدى ءمادي اعاعا بەردىم. كۋرس اياقتادى، ءبىز ءمادي اعامەن اسا ءبىر قيماستىق سەزىممەن قوشتاستىق.
  20 - تامىز كۇنى مەنىڭ الگى حابارىم «ىلە گازەتىندە» جاريالاندى، بۇل مەنىڭ اقپارات سالاسىنا العاش قادام باسقان ەڭ باقىتتى، ەڭ ەستەن كەتپەس شاعىم بولدى. سول جىلى قىركۇيەك ايىندا ماعان ءمادي اعادان حات كەلدى، ول كىسى حاتىندا: «ىلە حالىق راديو ستانسياسىنا ديكتور الاتىن بولىپتى، مەن سەنىڭ جاعدايىڭدى ايتتىم، سەن قۇلجاعا كەلىپ ەمتيحان بەر» دەپتى. مەن دەرەۋ قۇلجا قالاسىنا بارىپ ەمتيحان بەردىم، ەمتيحاننان جاقسى ناتيجەمەن ءوتتىم، وكىنىشكە وراي مەن تاۋار استىقتان يگىلىكتەنبەگەندىكتەن، ولار قابىلداۋعا امالسىز قالدى. بۇل تالەيسىزدىككە مەن قاتتى نالىدىم، ءبىراق ءمادي اعا ماعان كوپتەگەن اقىل - كەڭەستەرىن بەرىپ، جاسۋدىڭ ورنىنا جالىنداۋعا جىگەرلەندىردى.
  1985 - جىلى شينجياڭ گازەتىنەن قۇسايىن ءۋالشا ۇلى اعامىز كەلىپ، ءبىر اپتالىق تىلشىلەر كۋرسىن اشتى، قۇسايىن اعانىڭ اقپارات جايلى سويلەگەن لەكسياسى ماعان ەرەكشە اسەر ەتىپ، اقپاراتتىڭ قىرى مەن سىرىن ۇعىندىردى. كەيىن ءمادي اعامەن ۇزدىكسىز حات الىسىپ، تەلەفوندا سويلەسىپ، اقپارات جايلى كوپتەگەن كەڭەستەر الىپ تۇردىم.
  بيىل 5 - قاڭتاردا ىلە قوناق سارايىندا ءمادي اعامەن كەزدەسىپ، ەمەن - جارقىن اڭگىمەدە بولدىم، ارادا ۇزىن جىل كەزدەسپەگەن ەدىك، ءمادي اعا سول جالىنداعان قايراتىنان ءالى قايتپاپتى، اعىن سۋداي زۋلاعان جىلدار مەن ايلار ونىڭ ماڭدايىنا ءاجىم ىزدەرىن سالىپ، شاشىن اق كۇمىستەي اعارتىپتى، قوس جانارى الىسقا قادالعان قىراننىڭ كوزىندەي نۇر شاشادى، ءجۇرىسى شيراقى، ويى سەرگەك. مەن اسىل اعانىڭ جارقىن بەينەسىن كورىپ، امان - سالەمنەن سوڭ:
  − اعا، ءسىز بەن قۇسايىن ءۋالشا ۇلى اعامىزدىڭ ۇستازدىق تاربيەلەرىڭىزدىڭ ارقاسىندا، اقپارات سالاسىندا ازداپ تابىستارعا جەتكەندەي بولدىم. اتاپ ايتسام، ەلىمىزدەگى جانە قازاقستانداعى ونەر ادامدارىمەن كەزدەسىپ، اق باتاسىن الدىم. ەلىمىزدەگى بادەت اقىمەتجان ۇلى، مۇراتبەك تەسەباي ۇلى، ورازقان احىمەت ۇلى، ءتالىپباي قاباي ۇلى، قىرعىزدىڭ ايگىلى ماناسشىسى ءجۇسىپ ماماي ۇلى، مالىك شيپان ۇلى، حاميت ىسقاق ۇلىنىڭ جۇبايى ءجاميلا قۇربان قاتارلى ادامدار جايلى ماقالا جازدىم، اقىن تۇمانباي مولداعاليمەن كەزدەسكەندە، ءسىزدى ايتىپ ەدىم جاقسى تانيتىندىعىن ايتىپ، سىزگە سالەم ايتتى، - دەدىم.
  ءمادي اعا بۇل ءسوزدى ەستىپ، ءبىر ءسات ءۇنسىز قالدى، بالا مىنەزدى ءمادي اعانىڭ ەسىنە الدەنەلەر ءتۇستى بىلەم، ەرىكسىز كوز جاسىنا ەرىك بەرىپ:
  − قايران تۇماش، اسىل تۇماش، ول مەنىڭ سۇيىكتى دوسىم ەدى، ول ومىردەن ەرتە كەتتى، ونىڭ عاجايىپ تۇلعاسى ەلدى بەرەكە - بىرلىككە شاقىرعان، جاستاردىڭ ەڭبەگىن، جاستاردىڭ ماحابباتىن جىرلاعان التىن شىعارمالارى عاسىرلار بويى حالىق جۇرەگىندە ساقتالادى، - دەدى.
  −ءبىر قىزىعى، رەتى كەلگەندە ءدۇلدۇل ءانشى نۇرعالي ءنۇسىپجان جايلى جازعان «جان ەدىم جۇرەگىمدى ەلگە ارناعان» اتتى ماقالامدى ول كىسىگە وقىپ بەردىم، ول كىسى تاڭىرقاپ: «سەن جۇڭگوداعى قايسى جۋرناليستەردى تاربيەلەيتىن مەكتەپتى تاۋىستىڭ؟» - دەپ سۇرادى. مەن ازىلدەپ: ءمادي ابدىراحمان ۇلى مەن قۇسايىن ءۋالشا ۇلىنىڭ مەكتەبىن تاۋىستىم، - دەدىم. «باسە، 2 ۇلكەن مەكتەپتى تاۋىسقان ەكەنسىڭ عوي، ول مەكتەپ قۇلجادا ما، ۇرىمجىدە مە؟» - دەپ سۇرادى. مەن بۇل ءسوزدىڭ ءازىل ەكەنىن ايتقانىمدا، ول كىسى قارقىلداي كۇلىپ: «قايماعى بۇزىلماعان قازاق ءتىلى جۇڭگودا ەكەن، مەن جايلى قازاقستاندىق جۋرناليستەر جازدى، ءبىراق ولاردىڭ جازعانى سەنىڭ جازعانىڭمەن ۇقسامايدى» - دەدى. بۇل سوزگە ءمادي اعا قاتتى ريزا بولىپ:
  − راقىمەت، اينالايىن قازاقتا «جاتقانعا جان جۋىمايدى، جۇرگەنگە جورگەم ىلىنەدى» دەگەن ءسوز بار، سەنىڭ كوڭىلىڭ تازا، نيەتىڭ اق بولعاندىقتان اڭساعان ارمانىڭا جەتتىڭ، سەنىڭ شىعار بيىگىڭ ءالى الدا، - دەدى. مەن:
  − ءمادي اعا، ءوزىڭىزدىڭ ءومىر بايانىڭىزدى ايتىپ بەرمەيسىز بە؟ - دەدىم. سوندا ءمادي اعا توسىلىپ وتىرماستان اڭگىمەسىن باستاپ كەتتى.
  ءمادي اعا 1936 - جىلى قورعاس اۋدانىنىڭ اقسۋ اۋىلىندا دۇنيەگە كەلىپتى. ءومىر ادامدى اقپاندى ايازىمەن، نوسەرلى جاڭبىر، شىلىڭگىر ىستىعىمەن سىنايتىن سياقتى، اكەدەن ىشتە قالىپ، جارىق دۇنيەگە كەلگەن سوڭ، شەشەسى ءماريا اكە ورنىنا اكە، شەشە ورنىنا شەشە بولىپ باعىپ - قاعىپ وسىرەدى. ويلاماعان جەردەن تاعدىر 8 جاسىندا شەشەدەن ايىرادى، ءسابي جۇرەگى سىزداپ، اناسىنان ايىرىلىپ بوتاداي بوزداپ قالا بەرەدى. 8 جاستاعى ءسابيدىڭ اتا - اناسىنان بىردەي ايرىلۋى قانداي قاسىرەت، قانداي وكىنىش؟! كىسى قولىندا تاقارشىلىق پەن جوقشىلىقتى باستان وتكىزىپ، كوپتەگەن جاپا - ماشاقات شەگىپ ءومىر وتكىزەدى. العاشىندا اقسۋ مەكتەبىنەن، كەيىن سۇيدىڭ قالاشىعىنداعى ورتالاۋ مەكتەپتە جەتىم بالالارعا جاسالاتىن قامقورلىق نەگىزىندە وقىپ، ءبىلىم الادى، سوڭىنان قۇلجا قالاسىنداعى احمەتجان قاسىمي اتىنداعى ماماندار جەتىلدىرەتىن ءبىلىم ورداسىندا ءبىلىم الىپ، 1951 - جىلى قاڭتار ايىندا ىلە ايماقتىق قوعام حاۋىپسىزدىگى مەكەمەسىنە قىزمەتكە ورنالاسادى. بۇل جىلى اقپان ايىندا «شينجياڭ گازەتى» مەكەمەسىنىڭ شاقىرتۋىمەن، شينجياڭ گازەتىنە بارىپ كومەكشى رەداكتور، ءتىلشى بولىپ قىزمەت ىستەيدى. سول جىلى ماۋسىم ايىندا «ىلە گازەتىنە» قىزمەتكە كەلەدى. 1955 - جىلى شينجياڭ گازەتى قازاق رەداكسياسى قۇلجا قالاسىنا جوتكەلىپ «ىلە گازەتى» بولىپ شىققاندا، تاعى دا سول گازەتتىڭ ساياسي - زاڭ، ادەبيەت - كوركەمونەر ءبولىمىنىڭ جاۋاپتى رەداكتورى بولىپ مىندەت وتەيدى جانە گازەتتىڭ نەگىزگى بەتتەرىنىڭ جاۋاپتى رەداكتورى بولىپ ىستەپ، 1996 - جىلى دەمالىسقا شىعادى.
  ءمادي اعا مەكتەپ قۇشاعىندا وقىپ جۇرگەن كەزدەن - اق ولەڭ، ماقالا جازا باستاپتى. سول تۇستا شىعاتىن گازەت - جۋرنالداردا «دوسىما حات»، «تاڭ قۇشاعى»، «كوكتەم» سياقتى شىعارمالار جاريالاپ، كوركەم ادەبيەتتىڭ تابالدىرىعىن اتتاعان ەكەن. سودان بەرى 66 جىل بولىپتى، سول 66 جىلدى ۇزدىكسىز ۇيرەنۋمەن، ىزدەنۋمەن وتكىزىپتى، جازعان شىعارمالارىندا، نەگىزىنەن، ازات جۇڭگوداعى ءار ۇلت حالقىنىڭ باقىتتى ءومىرى، ادال ماحابباتى، ەڭبەكشىلەردىڭ ەرەن تابىسى، قاراپايىم اۋىل ادامدارىنىڭ تىنىس - تىرشىلىگى جىرلانىپتى، سولاردىڭ ىشىندە «سايرام تولقىندارى»، «ءىز»، «گۇلباق»، «قارلى تاۋلار»، «اق جەلكەن» قاتارلى شىعارمالارى وقىرماندار اراسىندا جاقسى اڭىس قوزعايدى. سونداي - اق ۇزاق جىلدىق تىلشىلىك ىستەۋ تاجىريبەسىنە نەگىزدەلىپ، قايناعان ومىرگە تەرەڭ بويلاپ جازعان «ءبىزدىڭ اۋىلدىڭ قىزى»، «دالا گۇلى»، «اۋىل قىزدارى»، «اكتەر جانە ءومىر» قاتارلى اڭگىمەلەرىمەن بىرگە، «ارميامىزدىڭ العاشقى ءانشى قىزى»، «الىپتاردىڭ اناسى»، «بولعان سوڭ ءبىزدىڭ وتاندا، وسىنداي ىلعي جاقسى ادام»، «كوش»، «وڭتۇستىك تەڭىز بويىندا» قاتارلى ەسسە - وچەركتەرى وقىرمانداردىڭ جاپپاي قارسى الۋىنا يە بولادى.
  ءمادي اعا ادەبي جاسامپازدىقپەن شۇعىلدانعان 66 جىلدا «ەر جۇرەك اكە، باتىر ۇل» اتتى وچەرگى مەملەكەتتىك 1 - دارەجەلى سيلىققا، «قۋانىش قۇشاعىندا»، «كوش»، «ۇلى قورعان» جانە «ولەڭ تۋرالى ولەڭ» اتتى شىعارمالارى اۆتونوميالى رايوندىق جانە ىلە قازاق اۆتونوميالى وبلىستىق 1 - ، 2 - دارەجەلى سيلىقتاردى ەنشىلەيدى، سونداي - اق ورتالىق حالىق راديو ستانسياسىنىڭ، شينجياڭ حالىق راديو ستانسياسىنىڭ، «شينجياڭ گازەتى»، «ىلە گازەتى»، «شۇعىلا»، «ىلە ايدىنى»، «شينجياڭ ايەلدەرى» قاتارلى جۋرنالداردىڭ سان مارتەبە سيلىعىنا يە بولىپتى. ىلە قازاق اۆتونوميالى وبلىستىق پارتكوم ۇگىت ءبولىمى، ادەبيەت - كوركەمونەرشىلەر بىرلەستىگى جاعىنان سان رەت ماداقتالىپ سيلانىپ، داڭق گراموتاسىن الىپتى. سونىمەن بىرگە «رەسپۋبليكام ەسەيىپ - ەرجەتۋدە» اتتى توپتاما ولەڭدەرى «شۇعىلا» جۋرنالى وتكىزگەن جۇڭحۋا حالىق رەسپۋبليكاسى قۇرىلعاندىعىنىڭ 60 جىلدىق قۇرمەتىندەگى شىعارمالار باسەكەسىندە «الپىس جىلدىڭ الاۋى» سيلىعىن الدى. ول «ىلە گازەتى» مەكەمەسى جاعىنان كوپ رەت وزات قىزمەتكەر، تاڭداۋلى كوممۋنيست بولىپ باعالانۋمەن بىرگە، جۇڭگو تىلشىلەر قوعامىنىڭ «جۋرناليستيكاعا سىڭىرگەن ەرەن ەڭبەگى ءۇشىن» داڭق مەدالىن الادى. ەسىمى «جۇڭگو عالىمدارى»، «جۇڭگو از ۇلت ماماندارى»، «جۇڭگونىڭ تاڭداۋلى رەداكتورلارى» جانە «حالىقاراعا ايگىلى ادامدار» توپتاماسىنا ەنەدى. «سايرام تولقىندارى»، «ءىز»، «گۇلباق»، «قارلى تاۋلار»، «كوز الدا قالعان كوپ بەينە»، «باتىس شەكارا ارداگەرلەرى»، «حالىقتىڭ قاھارمان ۇلانى»، «بار داۋىسپەن»، «تۋىسقان ۇلت اقىندارىنىڭ ولەڭدەرى» قاتارلى كىتاپتارى باسپادان شىقتى ءارى «ولەڭ - داستاندار توپتاماسىن»، «وچەرك - بايىمداۋلار» قاتارلى كىتاپتارىن باسپاعا ۇسىنىپ وتىر. ءبىر ءبولىم شىعارمالارى حانزۋ، ۇيعۇر، قىرعىز، ورىس تىلدەرىنە اۋدارىلدى. وسى ۋاقىتقا دەيىن 3000نان استام ولەڭ، 30عا جۋىق داستان، 300دەن استام پۋبليستيكالىق شىعارمالار، ماقالالار جازىپتى.
  − قازىرگى اقپارات ورىندارىنداعى شاكىرتتەرىڭىزدىڭ بەينەسى قالاي؟ - دەگەن سۇراۋىما، ءمادي اعا:
  − الدىمەن، مەن ءوزىمدى باقىتتى ۇستازبىن دەپ ايتار ەدىم. بۇلاي دەيتىنىم، ۇزاق جىلدىق جۋرناليستىك ومىرىمدە ىلە، التاي، تارباعاتاي ايماقتارىنا بارىپ ءارى ىلە وقۋ - اعارتۋ ينستيتۋتى، ىشكى موڭعۇل ۋنيۆەرسيتەتى قاتارلى ورىندارعا بارىپ، كوپتەگەن اقپارات اۋەسكەرلەرىنە لەكسيا جاساپ، ءوز تاجىريبەمدى تانىستىرىپ، ولاردىڭ ارمان ساپارىنا اق جول تىلەپپىن. سول كەزدەگى جاس تالاپتار بۇل كۇندەرى ەلىمىز ءىشى - سىرتىنا تانىلعان اقىن - جازۋشى، اقپاراتشى بولدى. قازىر «ىلە گازەتى»، «ىلە كەشى» قاتارلى اقپارات ورىندارىندا مەنىڭ كوپتەگەن شاكىرتتەرىم بار. ولار مەنىڭ ومىردەگى ەڭ اياۋلى، ەڭ قيماس باۋىرلارىم جانە ماڭگى ماقتان ەتەر تىرەگىم. ولار وتان الدىنداعى جاۋاپكەرشىلىكتەرىن دۇرىس ءتۇسىنىپ، ءوز مىندەتتەرىن ابىرويمەن ادا ەتۋدە، - دەدى.
  اڭگىمە وسى اراعا كەلگەندە، ءمادي اعانىڭ جۇزىنەن قۋانىش لەبى ەسىپ، الدەبىر بيىك بەلەسكە شىققانداي بولدى. ءدال وسى كەزدە، مەن 2008 - جىلى اقىن قادىر مىرزالىمەن كەزدەسكەندە، كوڭىلى گۇلدەي جايناپ، سەزىمى شالقىعان اقىن اعانىڭ ايتقان «ادام ومىرگە قىزىق كورۋ ءۇشىن كەلمەيدى، تەر توگۋ ءۇشىن كەلەدى. جاقسىنىڭ جۇرەگىندە پەرىشتەنىڭ شامى بار، سەزەدى ونى ادام ەمەس جانۋار. ادامنىڭ ەڭ اسىل قاسيەتى شاراپات، شاراپاتپەن ەمدەلەدى جاراقات. ءوزى التىن ادامعا التىن جۇلدىز ەشتەڭە قوسپايدى، ال ءوزى التىن ادام بولماسا جاراسپايدى» دەگەن سوزدەرى ەرىكسىز ەسىمە ورالدى. جاسى 80گە تاياپ، ماشاقاتتى ءومىر جولدارى جىگەرىن شىڭداپ، قايسار قاراعايداي اسقاق تۇرعان ءمادي اعانىڭ ەلىمىزدىڭ اقپارات، ادەبيەت - كوركەمونەر ىستەرىنە قوسقان تەلەگەي ەڭبەگى تاريحقا التىن ارىپپەن جازىلىپ، ۇرپاقتار جۇرەگىندە ماڭگى جاتتالاتىندىعى شىندىق.
  اڭگىمە سوڭىندا ءمادي اعانىڭ دەنىنە ساۋلىق، ومىرىنە باقىت تىلەپ، قاشاندا جارقىلداپ جانىمىزدا جۇرە بەرىڭىز دەگەن تىلەكپەن اتتاندىم.
جاۋاپتى رەداكتورى : ريزا حاميت قىزى
ءبىز تۋرالىبىزبەن بايلانىسسايت كارتاسىگازەتكە جازىلۋحابار - ماقالا جولداۋ