قىزمەت گرۋپپاسى ديقاندارمەن بىرگە قاربالاستىققا ءتۇستى   قابا: قىزمەت گرۋپپاسىنداعى كادرلار ناقتى ىستەر ىستەپ بەردى   شينجياڭنىڭ «ەڭ زەرەكتەرىن» تاڭداۋ قيمىلى باستالدى   وتىرىقتانعان مالشىلاردىڭ تىڭ تىرلىگى   قىستاققا تۇسكەن كادرلار جۇرت جۇرەگىن توعىستىردى   بۋىرشىن: قوي باعىمشىلىعىنان ۇلگى كورسەتۋ قىستاعىن قۇردى   «كىتاپ وقىعىڭ كەلسە ومىربەكتى ىزدە»   ناراتتاعى نار جىگىت  
چىن چۋانگوارى قاراي
چىن چۋانگو ، ش ۇ ا ر پارتكومنىڭ شۋجيى
شوكىرات زاكىر ارى قاراي
شوكىرات زاكىر، شينجياڭ ۇيعۇر اۆتونوميالى رايونىنىڭ ءتوراعاسى
ساندىق گازەت ارى قاراي
  • جۇڭگو
  • شينجياڭ
  • ايماق
  • الەم
سۋرەتتەر سويلەيدى ارى قاراي

اسىلدىڭ ءبىر سىنىعى اسىلبەك(2)

(ەسسە)

مەيرامبەك ءاشىمقان ۇلى

2017.09.15 16:20 كەلۋ قاينارى : شينجياڭ گازەتىنەن

  سونىمەن ارادا جارتى ايداي ۋاقىت وتكەندە، مەكتەپ بىتىرەتىن كەزىمىز دە جەتىپ كەلدى. مەكتەپ ءبىتىرۋ راسىمىندە سول كەزدەگى مەكتەپ توڭكەرىستىك كوميتەتىنىڭ مەڭگەرۋشىسى عالىم ءار اۋداننىڭ وقۋشىلارى ءوز اۋداندارىندا بولىسكە قاتىناساتىندىعىن، مەن جانە ءسانيا يبىراھيم قىزى ەكەۋىمىز «التاي گازەتى» رەداكسياسىنا بولىنگەنىمىزدى، مۇقامەت تۇرعالي ۇلى دەگەن ساباقتاسىمىز شينجياڭ حالىق راديو ستانسياسىنا بولىنگەندىگىن جاريالادى. ءسويتىپ، 1975 - جىلدىڭ شىلدە ايىنىڭ باسىندا مەن «التاي گازەتى» رەداكسياسىنىڭ تابالدىرىعىن اتتاپ، ءوزىمىزدىڭ اسىلبەك ساقىش ۇلىمەن قىزمەتتەس بولدىم.
  ول كەزدە «التاي گازەتى» رەداكسياسىنىڭ قازاق بولىمىندە ساناۋلى عانا ادام بار ەدىك. كەزىندە ماعاز رازدان ۇلى اعامىزبەن قىزمەتتەس بولعان ساقا رەداكتور مادەتقان شىبىقبايەۆ اعامىز، ودان قۇلداي كاكىباي بارات ۇلى، ماقسۇت ءماۋلىت ۇلى، ساپا جارمۇقامەت ۇلى، ادايقان جولدىباي ۇلى، جاۋ شۋەجۇڭ (اۋدارما رەداكتورى) دەگەن رەداكتورلار جۇمىس ىستەيتىن. ال اسىلبەك ساقىش ۇلى، ماعاز سۇلەيمەن ۇلى، مەن جانە قۇسىمان راحىمەت ۇلى تورتەۋىمىز كەزەكتەسىپ سىرتقا شىعىپ تۇراتىن ءتىلشى ەدىك. ءتىلشى بولدىم دەگەنىممەن، باستابىندا مەنىڭ دە قىرپۋىم بەلگىلى بولاتىن. گازەت جۇمىسىنان مۇلدەم حابارىم جوق، اۋىل بالالارى جاڭادان ۇيرەتكەن باس بىلمەيتىن تايىنشا سياقتىمىن. اركىمگە ءبىر جالتاقتاپ ءجۇرىپ رەداكسيادا ءبىر قاۋىم ۋاقىت ىستەگەننەن كەيىن، ازداپ قارا تانىعانداي بولدىم. دەسەدە، «تومەنگە تىلشىلىك ىستەۋگە جىبەرسە قايتەمىن؟» دەپ ىشتەي الاڭداپ جۇرەمىن. اسىلبەك، ماعازدار ول كەزدە ونان سالسا مۇنان شىعاتىن، جالاڭ قاققان تىلشىلەر ەدى. تىم قۇرىعاندا سولارمەن بىرەر دۇركىن ەرىپ شىعىپ باۋلىسىن كورسەم ەدى - اۋ دەپ ارمانداپ ءجۇرۋشى ەدىم. ءسويتىپ جۇرگەندە، قازان ايى قارساڭىندا ايماق بويىنشا ءار اۋداننىڭ «ءۇش دارەجەلى كادرلار جيىنى» ءبىر كۇندە اشىلاتىن بولدى، ءتىلشى بىتكەن شەپكە اتتانىپ، ءار اۋداننىڭ جيىن احۋالىن ۇستىنەن حابارلايتىن بولدىق. «قايسى اۋدانعا جىبەرەر ەكەن؟ جىبەرسە مۇنداي كولەمدى جيىندى حابارلاۋ مىندەتىن قايتىپ ورىندايمىن؟» دەپ ىشتەي قۋىستانىپ، الاڭداپ جۇرگەنىمدە، باستىعىمىز بۋىرشىن اۋدانىنا باراتىن اسىلبەككە مەنى قوسىپ جىبەرەتىن بولدى. كوكتەن تىلەگەنىمدى جەردەن بەرگەندەي قۋانىپ، ەرتەسى شۇعىل جابدانىپ، اسەكەڭە ەرىپ بۋىرشىن اۋدانىن بەتكە الىپ، تۇڭعىش رەتكى تىلشىلىك ساپارعا اتتاندىم.
  ءبىز بۋىرشىنعا جەتىپ، قوناقجايعا ورنالاسقاننان كەيىن، اسەكەڭ ماعان:
  − كەشكى اس ورايىندا ءار كوممۋنا، فەرما، اترەتتەن كەلگەن باسشىلاردىڭ جيىنعا دايىنداعان دوكلاتتارىن مۇمكىندىگىنشە جيناپ الىپ، كەشتە كورىپ شىعۋىمىز كەرەك. جازاتىن حابارىمىزعا پايدالانامىز، - دەدى. سول ايتقانى بويىنشا ىستەدىك تە، كەشىندە ەكى جاقتاپ دوكلاتتاردى كورىپ، اسەكەڭنىڭ كورسەتكەن جەرلەرىن ەستەلىككە ءتۇسىرىپ الدىم. كەلەسى كۇنى زور جيىن اشىلىپ، اۋدان باسشىلارى سالا بويىنشا دوكلات جاسادى، ورتالىقتىڭ، اۆتونوميالى رايوننىڭ قاتىستى حۇجاتتارى جەتكىزىلدى. تۇستەن كەيىن گرۋپپالارعا بولىنگەن تالقى باستالىپ كەتتى. ءبىز گرۋپپا تالقىسىنا كەزەك كىرىپ - شىعامىز. اسەكەڭ ماعان بىردە - ەكى ادامنىڭ تالقىداعى سوزىنەن ەستەلىك الدىرادى دا، كەلەسى گرۋپپاعا كىرەمىز. ءسويتىپ، گرۋپپا سايىن ءبىر - ءبىر كىرىپ شىققاسىن جاتاققا ورالامىز دا، حابار جازۋعا كىرىسەمىز. «مىنا مازمۇندى بىلاي جاز، انا جۇمىستى بىلاي كىرىستىر» دەپ اسەكەڭ ماعان ءجون كورسەتەدى دە، قالامدى ماعان تاستاپ قويىپ، ءوزى كىتاپ وقىپ ءوز الدىنا وتىراتىن.
  كىتاپ دەمەكشى، كەلگەندە ونىڭ قولىنداعى سومكەسى قوماقتىلاۋ بولاتىن. «اۋىستىرىپ كيەتىن كيىم - كەشەگى شىعار» دەپ شامالاعامىن. سويتسەم، ونىڭ كوبى كىتاپ ەكەن. ءسابيىت مۇقانوۆتىڭ «بوتاكوز»، بوريس پولەۆەيدىڭ «ناعىز ادام تۋرالى اڭىز»، كونستانتين فەديننىڭ «عاجايىپ جاز»، ماكارانكونىڭ «ۇستازدىق داستان»، ماكسيم گوركيدىڭ «كىسى ەسىگىندە» دەگەن سياقتى سول كەزدە ەل قولىندا جوق، ات جىعىپ ىزدەسەڭ دە تابىلا قويمايتىن كىتاپتار ەكەن. مەن: «بۇنىڭ ءبارىن الىپ جۇرگەنىڭ قالاي؟ ءبىر - ەكەۋى دە جەتەدى عوي»، - دەسەم، ول: «كىتاپ كوپتىك ەتپەيدى عوي، قالاعانىڭدى وقيسىڭ»، - دەدى. سوسىن ماعان: «جۋرناليست، اقىن نەمەسە جازۋشى بولۋدان دامەلى بولساڭ، كىتاپ وقى، كىتاپ وقىماساڭ تۇك تە تىندىرا المايسىڭ» دەپ ەدى. مەن ءسابيىت مۇقانوۆتىڭ «بوتاكوز» رومانىن سول ساپاردا اسەكەڭنىڭ قولىنان وقىپ ەدىم. ءسويتىپ، جۋرناليستىكتىڭ العاشقى قادامىن اسىلبەكتىڭ جەتەگىندە باستاعان ەدىم، مۇنى قايدان ۇمىتايىن!
جاۋاپتى رەداكتورى : ريزا حاميت قىزى
ءبىز تۋرالىبىزبەن بايلانىسسايت كارتاسىگازەتكە جازىلۋحابار - ماقالا جولداۋ