قىزمەت گرۋپپاسى ديقاندارمەن بىرگە قاربالاستىققا ءتۇستى   قابا: قىزمەت گرۋپپاسىنداعى كادرلار ناقتى ىستەر ىستەپ بەردى   شينجياڭنىڭ «ەڭ زەرەكتەرىن» تاڭداۋ قيمىلى باستالدى   وتىرىقتانعان مالشىلاردىڭ تىڭ تىرلىگى   قىستاققا تۇسكەن كادرلار جۇرت جۇرەگىن توعىستىردى   بۋىرشىن: قوي باعىمشىلىعىنان ۇلگى كورسەتۋ قىستاعىن قۇردى   «كىتاپ وقىعىڭ كەلسە ومىربەكتى ىزدە»   ناراتتاعى نار جىگىت  

ءۇش مونشاق

سەرىك كابەن ۇلى

2018.01.14 14:15 كەلۋ قاينارى : شينجياڭ گازەتىنەن

  قىس كەلىپتى
قىس كەلىپتى ءبىزدىڭ جاققا تاعى دا،
ءبىر - اق تۇندە كومىپ اقشا قارىنا.
تال - تەرەكتەر كۇمىس مونشاق تاعىنا،
تاۋ - دالانى وراپ اپپاق ساعىمعا،
كوردىڭدەر مە قىس كەلىپتى تاعى دا.

كيىز پيما، تەرى شالبار قاۋدىرلاپ،
جۇگىرەتىن قويان قۋىپ ساي قۇلداپ.
ەگەرلەسىپ ءبىر سۇيەككە تالاسىپ،
كۇرەسەتىن، تىرەسەتىن قارعا اۋناپ.
كوك بالاق بوپ كەشتە ۇيگە قايتاتىن،
مۇز ۇستىندە سىرعاناقتاپ نۇر ويناپ.
كەشەگىدەي وتە شىققان سول ءبىر قىس،
ساعىم بولىپ كوز الدىمدا ءجۇر ويناپ.

اق ايازدان تەرەزەلەر سىقىرلاپ،
قاڭىلتىر پەش اعاش وتىن شىرتىلداپ.
كارەسىن شام كۇڭگىرت شاشىپ جارىعىن،
تۇراتۇعىن بوساعادا جىلتىلداپ.
ەرەسەكتەر توردە كەڭەس قۇرعاندا،
وتىراتىن ەسىك جاقتا تىڭ تىڭداپ.
ءسابي كوڭىل ءار نەلەردەن قوبالجىپ،
بالا جۇرەك سوعاتۇعىن لىپىلداپ.
جالىقپايتىن ەرتەگىسىن ۇلكەننىڭ،
وتىرساق تا كۇندە تۇندە مىڭ تىڭداپ.

كەش بولعاندا ەسىكتەرىن قاعاتىن،
ءانىمىز بار ءاربىر ۇيگە سالاتىن.
ءبىر كۇندەگى قىزىق دۋمان اقىرى،
قيماي بارىپ شىمىلدىعىن جاباتىن.
بالا قيال ەرتەڭىنە اسىققان،
سام جامىراپ جۇلدىزدارداي جاناتىن...

قىس كەلىپتى ءبىزدىڭ جەرگە تاعى دا،
تاۋ دالامدى قىمتاپ اپپاق قارىنا.
سودان بەرى ەستەن ءبىر ءسات كەتپەگەن،
تالاي جىلدار جۇرە تۇعىن ساعىنا.
سول ءبىر قىستىڭ ەلەستەرىن ىزدەگەن،
جۇرەگىمدى ۇستاپ الىپ قولىما.
اق كۇمىستەي ساماي شاشىم جەلبىرەپ،
مەن كەلەمىن بالا كۇنگى اۋىلعا،
تۋعان جەردى مالىپ اپپاق بوياۋعا،
قىس كەلىپتى،
قىس كەلە بەر
ءبىزدىڭ جاققا تاعى دا...



  وتىرامىن كۇي ويناپ
كوكىرەگىمدى ەتپەيىن دەپ جىن ويناق،
جىر جازامىن ءاربىر ءارپىن مىڭ ويلاپ.
جۇرەگىمدە قالماسىن دەپ كىر - داقتار،
وتىرامىن التى ىشەكتەن كۇي ويناپ.

ءومىر وتەر كۇندەپ، ايلاپ، جىل اۋناپ،
ءبارى دە وتەر قايتەم ونى تىم ويلاپ.
جالىققاندا تىرلىك دەگەن كۇيبەڭنەن،
وتىرامىن قىل ىشەكتەن كۇي ويناپ.

كوڭىلىمدى كەتسە بىرەۋ لايلاپ،
سەزىمىمدى باسۋ ءۇشىن شۇرايلاپ.
جۇرەگىمنىڭ پەرنەلەرىن ءداپ باسىپ،
وتىرامىن قوڭىرلاتىپ كۇي ويناپ.

كوكىرەگىمدى ەتە المايمىن جىن ويناق،
جازام جىرلار ءالى تالاي مىڭ ويلاپ.
ءومىر دەگەن الما - كەزەك دۇنيە،
قايتەسىڭدەر جۇرەگىڭدى لايلاپ.
تىرلىك اتتى كۇدىرى كوپ ساپاردان،
كەتەم سولاي كۇمبىرلەتىپ كۇي ويناپ...



  ەي، اقشا بۇلت، اقشا بۇلت
ەي، اقشا بۇلت، قايدا قالقىپ باراسىڭ؟
ەرەر ەدىم بولماعانى - اي قاناتىم.
سەنى كورسەم ەسكە ءجيى الاتىن،
ارتتا قالعان قايران ساعىم كۇندەرگە،
جول بار ما ەكەن قايتا اينالىپ باراتىن؟
كەزىڭ بار ما ءسال دامىلداپ قالاتىن؟
تۇرا تۇرشى تاۋسىلىپ ءجۇر تاعاتىم،
سۇراعىم كوپ سەنەن سۇراپ الاتىن.

ەي اقشا بۇلت جاۋھازىنداي تاپ - تازا،
جالاڭ اياق جۇگىرەتىن اق قاردا.
اق تاياقتى ات قىپ ءمىنىپ جارىسقان،
ايدى الام دەپ قولىن سوزعان اسپانعا.
جاستىق جالىن نايزاعايداي جالتىلداپ،
وتى لاۋلاپ جانىپ قالعان باقتارعا.
قيالىنا قىران ۇشىپ جەتپەيتىن،
قايتا اپارشى سوناۋ الىس شاقتارعا...

ەي، اقشا بۇلت، اسپاندا قالىقتاعان،
كەلەسىڭ - اۋ تالىعىپ الىس جولدان.
سالەم الىپ كەلدىڭ بە تانىستاردان؟
ساعىندىرىپ بىزدەردەن الىس قالعان.
كەتەسىڭ - اۋ قالمايسىڭ الىس جولدان،
سۇراعىم كوپ امال نە قالىپ قويعان،
تاعى بىزدەن ءبىر كۇندى ۇرلاپ الىپ،
قول بۇلعارسىڭ قايتەيىن الىستاردان...

جاۋاپتى رەداكتورى : ريزا حاميت قىزى
ءبىز تۋرالىبىزبەن بايلانىسسايت كارتاسىگازەتكە جازىلۋحابار - ماقالا جولداۋ