قىزمەت گرۋپپاسى ديقاندارمەن بىرگە قاربالاستىققا ءتۇستى   قابا: قىزمەت گرۋپپاسىنداعى كادرلار ناقتى ىستەر ىستەپ بەردى   شينجياڭنىڭ «ەڭ زەرەكتەرىن» تاڭداۋ قيمىلى باستالدى   وتىرىقتانعان مالشىلاردىڭ تىڭ تىرلىگى   قىستاققا تۇسكەن كادرلار جۇرت جۇرەگىن توعىستىردى   بۋىرشىن: قوي باعىمشىلىعىنان ۇلگى كورسەتۋ قىستاعىن قۇردى   «كىتاپ وقىعىڭ كەلسە ومىربەكتى ىزدە»   ناراتتاعى نار جىگىت  

ءساتتى ساپار

(دەرەكتى اڭگىمە)

كامالبەك بوقان ۇلى

2017.12.24 18:04 كەلۋ قاينارى : شينجياڭ گازەتىنەن

  كۇن شىعىستان ارقان بويى كوتەرىلىپ، بار الاپقا جىلى شۋاق ۇيىرىلە باستاعان شاقتا ءبىز دە كوزەۋلى جەرگە جەتىپ ۇلگەردىك. ءبىز شىققالى ەكى تاۋلىك بولعان.
  قىستاق تۇرعىندار كوميتەتىنىڭ قاقپاسىنىڭ ماڭدايشالىعىنا تارتىلعان قىزىل كەرمەگە جازىلعان «ۇلتتار ىنتىماعىنىڭ بەرەكەلى شاڭىراعى» دەگەن جازۋلار بۇگىنگى جينالىستىڭ مازمۇنىن ايتقىزباي - اق اڭداتىپ تۇر. قىستاق قورعانىن جاعالاي ىلىنگەن قىزىلدى - جاسىلدى لوزينكالار سامالمەن جەلپىنىپ، ءتۇستى تۋلار تولقىن اتادى.
  ءاپ - ساتتە كەڭ اۋلانىڭ ءىشى قارا ءنوپىر ادام تەڭىزىنە اينالدى. ءبىزدىڭ مەكەمەمىزدەن وسى قىستاققا تۇسكەن قىزمەت اترەتىنىڭ جاۋاپتىسى قادىر:
  − اۋىلداستار، نەشە تاۋلىك جول ءجۇرىپ، الىستان ات وكسىتىپ كەلگەن تۋىستارىڭىزبەن وسى ءبىر كوز ايىم ساتتەر ىشىندە جۇزدەسىپ، ىستىق قۇشاقتارىڭىز ايقارا اشىلىپ قاۋىشۋ الدىندا تۇرسىزدار. جۇپ قۇراعان تۋىستاردىڭ ەسىمدىگىن وقيمىن، ەسىمدىگى جاريالانعان تۋىستاردىڭ ساحنا الدىنا شىعىپ جۇزدەسۋىن وتىنەمىن، - دەگەنىندە دۋ قول شاپالاق ءۇنى بۇكىل قىستاقتى جاڭعىرتتى.
   اقىرى بۇرىن كورىسپەگەن تۋىسىمدى كورىپ، كوزايىم بولاتىن ساتتەر ماعان دا كەلدى، قولىنداعى تىزىمدىككە ۇڭىلگەن قادىر:
  − حالشام مەن جارىلقاسىندى جۇپ - جۇباي بولىپ تۋىستاسۋعا شاقىرامىن، - دەمەسى بار ما؟ «جۇپ قۇراپ» دەگەن ءسوزدىڭ ورنىنا «جۇپ - جۇباي» دەپ كەتىپ، جاڭىلىس ايتىلعان بۇل ءسوز بىرگە كەلگەن قىزمەتتەستەرىمە بولىپ بەردى:
  − ءسىزدىڭ اسىعىڭىز الشىسىنان ءتۇستى، جۇباي تاۋىپ قايتاتىن بولدىڭىز، - دەپ سان ساققا جۇگىرتىپ جاتىر.
  تۇرعان ورنىمنان جول تاۋىپ بارعانشا، مەنەن بۇرىن الدەقاشان ساحنا مىنبەسىنە شىعىپ ۇلگەرگەن ورتا بويلىدان جوعارى، توقپاقتاي قوس بۇرىمى قىناي بەلىنەن تومەن قۇلاعان، قارعانىڭ قاناتىنداي قايراتتى قارا شاشتارىن كوك تورعىن جاۋلىعىمەن باستىرا بايلاعان، تالدىرماش دەنەلى، اققۇبا ءوڭدى 50 جاستار شاماسىنداعى سار كىدىر ايەل ادىمداي كەلىپ مەنى قۇشاقتاي الماسى بار ما؟
  − وحو، جارىلقاسىن ساۋاقداشىم، ءتان سالاماتىڭىز ساق مۇ؟ حوتىن - باللارىڭىز ياقشىمۇ، مەنى تونىماي قالدىڭىزمۇ نىمو؟ نەمىگە مۇشىنشىلىق قىرىپ كەتكەنسىز، ۇكىمەتنىڭ ءبىزنى تۇققان قىلىپ كورىشتىرگەنىگە ۇشكىر، - دەپ بايەك بولىپ اماندىق سۇراپ قۇشاعىن جازار ەمەس. قىسىلعانىمنان جونىمنان تەر شىعىپ كەتتى، مەنىڭ ساباقتاسىم بولاتىنداي بۇل ايەل كىم بولعانى سوندا؟ مەنى شىن تانىپ تۇر ما دەپ اڭتارىلدىم. دەسەدە ونىڭ قوڭىراۋلاعان ءۇنى تانىس سەكىلدى، سالدەن سوڭ باجايلاي قاراعانىمدا بارىپ تانىدىم، باياعىداعى حالشامنىڭ ناق ءوزى، و، قۇدىرەت، وسىنداي دا ىستەر بولادى ەكەن - اۋ! «سىرلى اياقتىڭ سىرى كەتسە دە سىنى كەتپەگەن» دەگەن وسى - اۋ تەگى! اي ماڭدايىنىڭ استىنداعى، وڭ قاباعىنىڭ ۇستىندەگى سۇلۋ جۇزىنە جاراسقان سىركەدەي مەڭى بۇل كۇندەردە ءتىپتى ايشىقتالا تۇسكەن، قارلىعاشتىڭ قاناتىنداي قيىلعان قارا قاستارىنىڭ استىنداعى قاراقاتتاي قارا كوزى ۇشقىن اتادى، ايداي اجارى التىن كۇن نۇرىمەن الاۋلاپ، بال - بۇل جانادى. مىنە قىزىق، كەزىندە ماڭگى قيىلىسپايتىن ەكى پاراللەل سىزىقتاي ءبىزدىڭ ءومىر جولىمىز ول كەزدە ەكى باسقا جولمەن تارتسا دا ءدال بۇگىن تاعدىردىڭ قيسىنىن تاۋىپ قيۋلاستىرىپ جولىقتىرۋى - اي دەسەڭىزشى! وسىدان 30 جىل بۇرىن وسى وڭتۇستىك شينجياڭدا وسى ايماقتا جوعارى مەكتەپ ءبىلىم ورداسىندا بىرگە، ءبىر كلاستا، اۋەلى، ءبىر پارتادا وتىرىپ ءبىلىم العان ساباقتاسىم حالشام تۇر، ستۋدەنت كەزىندەگى ىستەرىنە وپىق جەپ، مەنى كورىپ ۇيالىپ، تارتىنعانى بىلاي تۇرسىن، ونىڭ ورنىنا ول ءتىپتى جەردەن تىلەگەنىن كوكتەن بەرگەندەي مەنىمەن كورىسىپ تابىسقانىنا مىناۋ ساحنا الدىندا شاتتىق شارباعىندا تەربەلگەندەي قۋانىشىندا شەك جوق، ءدۇيىم جۇرت الدىندا مەنىمەن كورىسكەنىنە كورىمدىك بەرەتىندەي سىڭاي بايقاتادى، كەزىندەگى كەلەڭسىز جاعدايلار ول ءۇشىن ماڭگى تارك ەتىلىپ ۇمىتىلعانداي، تىڭ تىرشىلىگىن قايتا باسىنان باستايتىن ناعىز رەفورماشىل ادامداي ەلەس بەرەدى.
  مىنە، حالشام مەنى ءۇش دوڭگەلەكتى موتوتسيكلىنە مىنگىزىپ، كوركەم كورىنىستى اعاشتارى ماۋەلەگەن داڭعىل جولدا اعىزىپ كەلەدى. كوز الدىما حالشام تۋرالى وتكەن كۇندەردىڭ ەلەستەرى كينو لەنتاسىنداي تارتىلا بەردى...
  مەن العاش حالشاممەن اۆتوبۋزدا تانىسقان ەدىم، ۇرىمجىدەن 6 قونىپ قاشقارعا كەلىپ، ونىڭ ەرتەسى تاعى دا حوتانعا بەلەت العانىمدا، العان بەلەتىم وتىراتىن ورىندىق بولماي، 2 كۇن تىك تۇرەگەلىپ بارۋىما تۋرا كەلدى. اۆتوبۋز تىنباي زاۋلاپ كەلەدى. ويلى - شۇڭقىرلى بۇزىلعان جولدارعا ءتۇسىپ سىلكىنگەنىندە، بىردە ارتقا شالقالاي، بىردە الدىعا تانتىرەكتەي بارىپ بويىمدى ارەڭ بيلەيمىن. مۇندايدا كۇننىڭ ىستىعىندا اق تەر، قارا تەرگە ءتۇسىپ ارەڭ كەلەمىن، بىردە قالعىپ كەتىپ، اۆتوبۋزدىڭ موڭكۋى قاتارلاسىپ الدىڭعى جاعىمدا وتىرعان قىزدىڭ ورىندىعىنىڭ ارقالىعىن ماڭدايىممەن سۇزە جىعىلدىم، وسىلايشا ابدەن زاپى بولعان كەزدەرىمدە ءتىپتى اۆتوبۋزدان تۇسە قاشقىم كەلەتىن. وسى ۇردىسپەن 6 ساعاتتاي تىك تۇرىپ قۇر سۇلدەرىم قالعان ماعان باعانادان قاراعىشتاپ كەلە جاتقان اققۇبا ءوڭدى، قىزىل گۇلدەي قۇلپىرعان ۇيعۇر قىزى جەڭىمنەن تارتىپ، تارتىنشاقتاعانىما قاراماي:
  − اكا، قىجىل بولماي مەنىڭ ورنىما بىراز ولتىرىپ الىڭا، - دەپ ورنىن نۇسقادى. مەن امالسىزدان بارىپ ونىڭ ورىندىعىنا وتىردىم. كوپ كورىم تىنىستاپ، جانىم تەرەزە تاۋىپ قالدى. اۋزىن اشسا جۇرەگى كورىنەتىن وتە اشىق - جارقىن، اق كوڭىل قىزبەن ءوزىم بىلەتىن از عانا ۇيعۇر تىلىندە سويلەسە كەلگەنىمدە، اقسۋدان كەلە جاتقان ساباقتاسىم حالشام بولىپ شىقتى.
  قالعان 2 كۇندىك جولدا اسحانادان بىرگە تاماقتانىپ، اۆتوبۋزدان ءتۇسىپ - شىققاندا دا بىرگە بولىپ، ەكەۋىمىز بارار جەرىمىزگە جەتكەنشە ەكى ەلى ايرىلماي بارعان ەدىك. وسى جاقىندىقتان دا بولار، ءبىر پارتادا وتىرىپ، ءبىلىمنىڭ كاۋسار بۇلاعىنا باس قويدىق. جاراتىلىسى وتە تەتىك، قۇيما قۇلاق، العىر حالشام 1 -، 2 - جىلدارى ءبىزدىڭ ۇيرەنۋ باستىعىمىز دا بولعانى بار. ساباقتا الدىڭعى لەكتە كەتىپ بارا جاتقان وقۋشىلاردىڭ قاتارىندا ەدى. قانداي ءبىر كيىمدى سايتان ازعىرعانىن كىم ءبىلسىن؟ ءبىر پارتادا وتىراتىن حالشامنىڭ باسقان - تۇرعانى ماعان ءتىپتى دە قانىق ەدى. ايتەۋىر 3 - جىلدىقتىڭ 2 - ماۋسىمىنان باستاپ حالشام بىرتە - بىرتە اربادان بۇزىلعان اتتاي ءجۇرىس - تۇرىسى قالىپسىز ادامعا اينالا باستادى، كەيدە كەشكى 2 ساعاتتىق پىسىقتاۋ ۋاقىتىنا كەلمەيتىن، ءتىپتى 1 − 2 كۇندىك ساباقتى دا قالدىرىپ ۇشتى كۇيدە جوعالىپ كەتەتىندى شىعاردى. ساباققا زاۋقى سوقپاي، كوبىندە، ەسىنەپ وتىراتىن بولدى. نەشە رەت كلاس جيىنىندا ەسكەرتۋ بەرىلگەنىمەن، ءونىمى بولماي ارتقا شەگىنە بەردى. بۇرىندار ەمتيحان ناتيجەسى 90نان تومەن تۇسپەيتىن ونىڭ ءنومىرى بىرتە - بىرتە تومەندەپ، 60 − 70 نومىرگە ءتۇسىپ، اۋەلى، كەي ساباقتاردان وتە الماي قالاتىن. سوڭعى جارتى ماۋسىمدا ۇنەمى مەكتەبىمىزدىڭ قاقپاسى الدىنا كاستيۋم - برۋلكا كيىپ، شاشىن قايىرىپ ارتقا تاراعان قارا مۇرتتى بىرەۋ پايدا بولعان ەدى. اۋەلى، ماعان ءبىر رەت كەزىگىپ:
  − ادەبيەت فاكۋلتەتىندەگى حالشامدى قىشقىرىپ جىبەرىڭا ۇكام، مەن ونىڭ اقسۋدان كەلگەن اكاسى، - دەپ جوعارى سورتتى تەمەكىسىن ۇسىنعان جەرى بار ەدى، وعان مەن دە ول كەزدە كوپ ءمان بەرمەگەن ەكەم. قاس تاسى ساۋداسىمەن شۇعىلدانىپ ىشكى ولكەلەرگە بارىپ زات وتكىزەتىن ۇلكەن ساۋداگەرمىن دەپ ءوزىن وسىلاي تانىستىراتىن ول، ءتۇرلى ايلا - شارعىلارمەن حالشامدى الدام قالتاسىنا تۇسىرگەن سول قارا مۇرتتى الاياق بولىپ شىقتى.
  اقىرى حالشام وقۋدى تاستاپ، الگى قارا مۇرتتىنىڭ ەتەگىنەن ۇستاپ كەتە باردى. كەيىن ەستۋىمىزشە، الگى قارا مۇرتتى ساۋداگەر ەمەس، كەزىندە اۋىل - قىستاقتان شىققان ءبىر الدامشى ەكەن، حالشامدى ءبىر اۋداننىڭ قيىر شەتىندەگى قىستاقتا تۇراتىن تارامىسىنا سۇيەنىپ ارەڭ وتىرعان كارى اكە - شەشەسىنىڭ ۇيىنە الداپ اپارىپ، نەكەسىن قيدىرادى. «باسقا تۇسسە باسپاقشىل» دەگەندەي توبەسىنەن جاۋماي جاسىل تۇسكەندەي بولعان حالشام امالسىز كونەدى. سول بەتى وسى قىستاقتا قالىپ قويادى. مىنە بۇل مەنىڭ حالشاممەن سودان 35 جىلدان كەيىنگى كەزدەسكەن اسا ءساتتى ساپارىم بولدى.
  حالشامنىڭ باستاۋىندا سىرتى جۇپىنىلاۋ كورىنگەن كوك سىرلى قاقپادان كىرگەنىمدە، كەڭ كاريدورلى اۋلا ىشىندەگى ءۇزىم، انار، الما، ورىك قاتارلى جەمىس اعاشتارى گۇلدەپ، جاڭا ءبىر مول نەسىبەلى كوكتەمنىڭ ءوز سانىمەن كەلە جاتقان تىڭ تىرشىلىگىن ايعاقتاعانداي. وسى ءسات ءبىزدىڭ دابىر - دۇبىرىمىزبەن تۇپكى ۇيدەن 16 جاستار شاماسىنداعى بۇرىمىن تال - تال قىپ ورگەن بۇلدىرشىندەي قىز شىعا كەلدى:
  − اپا، تۇققانىمىز مۇشى ادام ما؟
  − شۇنداق، ول مەنىڭ «داشۋەدە» وقىعان ساۋاقداشىم جارىلقاسىن بولىدۇ، - دەدى حالشام.
  ءتور ۇيگە كىرىپ جايعاسىپ وتىرعان سوڭ، مەن حالشامنىڭ اق قۇيرىق شايىن ىشە وتىرىپ ونى اڭگىمەگە تارتتىم:
  − ءيا، حالشام ساباقتاسىم، «ءۇي ىشىنەن ءۇي تىككەن جىلىلىققا جاقسى» دەگەندەي، كەزىندەگى ساباقتاستىق جاقىندىعىمىز، ءتىپتى، تۋىستان دا ىستىق ەدى - اۋ! تاعدىر ءبىزدى الىستاتىپ بارىپ، قايتا قوسقانداي تۋىس بولىپ وتىرمىز، بۇل ىلۋدە ءبىر كەزىگەتىن جاعداي، قازىرگى تۇرمىس كۇيىڭدى ايتا وتىر، - دەگەنىمدە، حالشام ىركىلگەن جوق:
  − ءومىردىڭ ماعان سيلاعان نەسىبەسى سول بولسا كەرەك، انا مەكتەبىمنەن ايرىلعاننان كەيىن، تاعدىردىڭ تالكەگىمەن باسىم دوپشا دومالاپ، سودان بەرى وسى قىستاققا، تارىم قۇمىنا تەرەڭ تامىر تارتتىم. مەنى العاش الداپ الدام قالتاسىنا تۇسىرگەن الاياق كوپ ۇزاماي ماشينا شىرعالاڭىنان ول دۇنيەگە اتتاندى، سودان كەيىن دە ەكى رەت توسەك جاڭعىرتتىم، ءبارى دە ساتسىزدىككە ۇشىرادى. سوڭعى كۇيەۋىم وسى قىستاقتاعى مەشىتتىڭ يمامى ەدى. سوڭعى كەزدە زاڭسىز ءدىني قيمىلدارمەن شۇعىلدانىپ، جاستاردىڭ نەكە ىسىنە ارالاسقاندىعى ءۇشىن، وتكەن جىلى ۇشقارىلىققا قارسى تۇرۋ كۇرەسىندە تۇرمەدەگى تور تەمىردىڭ ارجاعىنان كوزى جىلتىراپ، 6 جىلعا كەسىلىپ ول كەتتى. سونىمەن جۇپىنى كۇي كەشسەم دە اۋىرتپالىقتى كوتەرىپ، اتىز باسىندا ءوز اربامنىڭ دوڭعالاعىن ءوزىم دوڭگەلەتىپ كەلەمىن، - دەپ ءبىر توقتاعان حالشام ءومىردىڭ بۇراڭ جولدارىنا ءتۇسىپ قانشاما تار جول، تايعاق كەشۋلەردى كەشسە دە مويىماعان كوڭىلمەن ءوزىن - ءوزى ءور سەرپي ءسوزىن تاعى دا ساباقتاي ءتۇستى:
  − سونىمەن وزىمە ءتان ەكى قىز، ءبىر ۇلىم ەرجەتىپ، ءوز الدارىنا ءۇيلى - باراندى بولىپ كەتتى. مىنا قىزىم بيىل «قوس تىلدە» 8 - كلاستا قالاشىقتا وقىپ جاتىر، ساباقتا وتە وزات وقيدى، وسى قىزىمدى بار جيعان - تەرگەنىمدى جۇمساسام دا جوعارى مەكتەپكە دەيىن وقىتايىن دەگەن ارمانىم بار. تۇرمىسىم دا جامان ەمەس، 5 مۋ ەگىستىك جەرىم، 5 قويىم، ءبىر مۋلىق ميۋا باقشام، 10 تاۋىعىم بار، پارتيانىڭ ساياساتى جاقسى بولدى، تومەنگە تۇسكەن كادرلار، قىستاق تۇرعىندار كوميتەتى ماعان ەرەكشە كوڭىل بولەدى، تۇرمىس دەگەنىڭ، بىلايشا ايتقاندا، تىڭ تىرشىلىك، ال تىڭ تىرشىلىك − جالعاسقان ءومىر،ءومىر قايشىلىققا تولى كۇرەس ەكەن دە، ومىرگە كەلگەننەن كەيىن قالاي بايلىق جاراتىپ، ونىڭ راقاتىن قالاي كورۋ، ۇرپاق جالعاۋ، قالاي جاساۋ ءوز قولىڭدا ەكەن، - دەپ اۋزىنان ءسوز مارجاندارىن توگىلدىرگەنىندە ونى ومىردەن توقىعانى كوپ ءبىر عۇلاماداي سەزىنە بەردىم.
  − ءيا، حالشام ساباقتاسىم، باسىڭنان ءبىر قىدىرۋ ىستەر وتسە دە جاراتىلىسىڭا جاراسقان جالىنىڭدى سوندىرمەي، بارلىعىنا قاراعايداي قاسقايىپ، اقىرى بۇل شاققا دا كەلىپسىڭ، ەندى وتكەن ىستەرگە سالاۋات ايتىپ، بارلىعىن تىڭنان باستايمىز، - دەپ حالشامدى شابىتتاندىرىپ، جەلپىندىرە تۇسكەنىمدە، قىزمەت اترەتىنىڭ باستىعى قادىر كىرىپ كەلدى.
  − ءيا، جاكە، بىرگە وقىعان ساباقتاسىڭدى كورىپ، كوڭىلىڭىز شالقىپ، كوز ايدىن بولعان شىعارسىز، بۇل ءسىز ءۇشىن، شىنىندا، ۇمتىلماس ءساتتى ساپار بولدى عوي، - دەپ سويلەي ءجۇرىپ، ءسۇپىنىڭ شەتىنە جايعاسقان ول:
  − جارىلقاسىن اعا، ءبىز وسى كوكتەمنەن باستاپ حالشامنىڭ 5 فىن جەرىنە كوكونىس وسىرەتىن قالتقى سالىپ بەرىپ، وتباسى كىرىسىن جوعارىلاتايىق دەگەن ەدىك، قالتقى سالۋعا 20 مىڭ يۋان اقشا كەتەدى ەكەن، ءبىز بانكەدەن كەپىل بولىپ، ارەڭ 10 مىڭ يۋان اقشا الىپ شىقتىق، ءوزى 5000 يۋان شىعاردى، ەندى ءسىز قارىزعا بولسا دا ساباقتاسىڭىزعا 5000 يۋان بەرىپ كەتسەڭىز، - دەدى كەلگەن ماقساتىنىڭ بەتىن اشا سويلەپ. مەن ءارى - ءسارى بولماستان دەرەۋ قول تەلەفونىمدى جالعادىم:
  − ءشاربات، مەن وڭتۇستىكتەگى الگى تۋىسىمنىڭ ۇيىنەن تەلەفون بەرىپ تۇرمىن، وسى تۋىسىمىزدىڭ كوكونىس قالتقىسىن سالۋعا 5000 يۋان اقشا جەتپەي قالىپتى، مەنىڭ كارتچكاما دەرەۋ 5000 يۋان اقشا سالساڭ. تاعى ءبىر جاي، تۋىسىمىز حالشامنىڭ بيىل 8 - كلاس وقىپ جاتقان ريزۋانگۇل اتتى قىزى بار ەكەن، ءبىز ۇرىمجىگە اپارىپ ۇيىمىزدە تۇرعىزىپ وقىتساق دەگەن ويىم بار، وعان قالاي قارايسىڭ؟
  − بولادى، بولادى، 5000 يۋان ازداۋ بولار، قازىر - اق 10 مىڭ يۋان سالايىن، ءبىز «مالعا باي بولساق تا، باسقا كەدەي بولدىق قوي». جالعىز ۇلىمىز ۇلاردىڭ قارىنداسى، ءبىزدىڭ قىزىمىز بولسىن، ريزۋانگۇلدى قالدىرماي وسى جولى ەرتە كەل، ۇرىمجىدەگى ءتۇيىندى ورتا مەكتەپتەن، ءتىپتى، ۋنيۆەرسيتەتكە دەيىن وقىتايىق، - دەپ ءتاڭىر تىلەۋىڭدى بەرگىر ايەلىم ءبارىن دە ءوزى كەسىپ - ءپىشىپ، قۇرداي جورعالاپ، نەبارى بىرەر مينۋتتىڭ ىشىندە بار جۇمىستى ءبىراق تىندىردى.
  سودان بەرى، مىنە 2 جىلعا جۋىق ۋاقىت ءوتتى. ريزۋانگۇل بيىل 9 - كلاستا، ءوز ۇيىمىزدە تۇرىپ وقيدى. وتە زەرەك، اقىلدى، زيالى وتباسىنىڭ بالالارىنداي جان - جاقتىلى تاربيە الىپ ءوسىپ كەلەدى، ونىڭ كەلەشەگىنەن ءبىز ەرەكشە ءۇمىت كۇتەمىز.
   قوي ۇستىنە بوز تورعاي جۇمىرتقالاعان، اق تۇيەنىڭ قارنى جارىلعان، ماي شاربىلى سەمىز كۇزدىڭ ءبۇيىرى شىققان شاق. ءۇرىمجى اسپانى بۇگىن ءتىپتى اشىق. مىنە ءبىز پويەز ۆوكزالىندا تۇستەن كەيىنگى ساعات 2 جارىمدا حوتاننان كەلەتىن پويەزدى تاقاتسىزدانا كۇتىپ تۇرمىز. مىنەكي، كوپتەن كۇتتىرگەن پويەز دە ءدال ۋاقىتىندا جەتىپ ۇلگىردى. قوس رەلىستە ساعىمداي اققان پويەز سىناپتاي سىرعىپ بارىپ باياۋ توقتادى. انە 10 - ۆاگوننان حالشام دا اي ماڭدايى جارقىراپ قۋانىشتى بەينەدە ءتۇسىپ كەلەدى. ايەلىم مەن حالشامنىڭ، ريزۋانگۇل مەن حالشامنىڭ ىستىق قۇشاقتارى جازىلار ەمەس، وتە - موتە، حالشام ريزۋانگۇلگە ءبىر، بىزگە ءبىر قاراپ قۋانعانىنان:
  − ۋاي - ۋاي، ريزۋان، سەنىڭ بويىڭ ءوسىپ كەتىپتى عوي، ويىڭ دا وسكەن ۇقسايدى، سەنى بايدىڭ بالاسىنداي كيىندىرىپتى عوي مىنا كىسىلەر، سۇلۋ سىمباتىڭا مىنا كيىمدەرىڭ نەتكەن جاراسقان، ەندىگى اكە - شەشەڭ وسى كىسىلەر، ەندى بۇلار ماعان سەنى قيمايدى دا بەرمەيدى عوي، - دەپ حالشام قىزىنىڭ باسىنان مەيىرلەنە سيپاي، كوزىنەن ءبىر تامشى ىستىق جاسىن ىتقىتىپ جىبەردى.
  دەگەنمەن، حالشام ءبىزدىڭ ويىمىزداعىنى ءداپ باسىپ ايتتى، ءبىز ريزۋانگۇلدى بالا قىلىپ الۋعا الدەقاشان بەكىگەن ەدىك ...
جاۋاپتى رەداكتورى : ريزا حاميت قىزى
ءبىز تۋرالىبىزبەن بايلانىسسايت كارتاسىگازەتكە جازىلۋحابار - ماقالا جولداۋ